اسمك المقصود – رائد ابو فتيان

قصيدة اسمك المقصود للشاعر رائد ابو فتيان مكتوبة, قصائد مكتوبة, شعر شعبي

لهسه مامستوعب الصاير صدگ
بدلتني وغيري اخذ دور العشگ

يالخنتني گبالي مو هيج اليخون
غير اول مرة لازم نفترگ!

اسولف باسم غيرك واسمك المقصود
اليعوفك تستحي من تجيب طارية

موبس عاشگك متعود امشي وياك
ويكتل هجر اليحاجيك يومية

من انگطعت اخبارك واني والدخان
انقلاب اعله الهوى سوينه بالرية

لعبت بخلقة الله من گطعت وياي
حلو وجهي وعفت شحة بمعانية

الباگك مو سبع انت الردت تنباگ
والواسوني احس اتشمتوا بيه

گطعوا نومتي الحلوة بخبر موزين
اهلي انباگوا وربعي الحرامية

لا وگفت الدنيا ومامشت شبرين
وماحب گبل كلمن گال مگضية

والله ونكتت ايدك من جنت تغتاض
بده يعبرني حتى البيده عوچية

هسه شلون اكمل وحدي من دونك؟
وانا خسران دنيا الخاطر عيونك

هو الروحه ضده شجابة ع النسيان؟
انت تخونها وماتعرف تخونك

المهم وياك الي عتبة وگلب مكسور
وظهر عوده انحنه واصواب بالجنحان

من تگلي هم تگدر بدوني تعيش؟
ماچنت ادري تقصد جايك هجران!

عمري بغيبتك باقيله مشرارين
للدكتور مرة ومرة للدفان

وباجر من اموت يهز ادينه الدود
الهجر خلاني ثوب وذكريات انسان

يسري الكل ربع ساعة اريد احجي
ومدري شلون اجره الخانة النسيان

نقطة ضعفي شاماتك الجنها اسرار
لان تنشاف بس من توگع القمصان

وين انساك جربت السمر والبيض
ملهوف اعتنيهم بس ارد فشلان

كل العاشروني مفارگين احباب
مانسوني عينك بس نسوا بيه

دخيل الله الزلم من تعشگ بلا راي
ماتفرق على الماخوذة فصلية

واني وگلبي ندري تدور الزلة
بس هو اليملنة نگوم منملة

صعدنا صعود للماعرفوا ينزلون
وشمرنه ارواحنه من الهيبة للذلة

الصور وصلت وديكم والله مو حلوات
منزعك محبسي وماعرف شخله

انا اول واحد يشگ زيجة مو عالمات
المثلك مودموع الراس انزله

حافظ شكو بروحي من الجرح للياء
سهلة تروح عندك عندي مو سهلة

ورغم كل هذا اگول محالل ومعذور
انا المنطي كلشي ومانطه بخله؟

انا الكاتلني گضيت العمر مهيوب
وهل ظليت رفعة راس مابية

بدونك جده من الناصيات فياي
الگبل حتى الشجر يتثاوب بفية