الرئيسية / الشعر الشعبي / شمدريني – ادهم عادل

شمدريني – ادهم عادل

مثل اليموت ولديها وراحت ادفنة بمغربية..
هيج روحي تموت بية..
هيج عيني أطيح گطرة أعلى الجفافي بين أدية..
من أشوفك من ورة حجابك تبين طرف ترجية..
آنة جيت بطرگ گلبي وأنت وعيونك علية..

حسبالي اليحب مثل الندى يسافر..
وحسبالي الدمع مثل الوكت صاير..
شمدريني الدمع يومية يرجع شاب
شمدريني العشگ ما يحترم شاعر..
أنة كل يوم أودع عل الخدود عيون
مثل ذاك اليودع صاحبة بساتر..
يبو طول اليداين للنخل بستان
ويبو خدود التگول خدود اليسافر..
يبو چفوف التحط بالبال راحة بال
ويبو عيون الجبيرة التجبر الخاطر..
أريد أختل بعينك ختلة العرسان
وأريد وياك أسوي الكلشي ما صاير..
نفس الحيرة بس الفرق بية ظنون
وهذاك أنتة إعلى نسمة وي الشعر حاير..
وأنة لوما عيونك ما تهمني الريح
ولا تاخذني صفنة ولا صرت شاعر..
ضميتك گمر بي يحلم المسجون
وشلتك سما بروحي ومن طحت نجمة ..
وهذاك أنت العزيز العندة كل الناس..
وهذا آنة وطن بس ولدة مو يمة..
طحت مثل التراچي الذهب من أطيح
اذا شافت أبنها معرس بدمة..
يبو ضحكة التهاجر بالظلام شراع
من تضحك شفافك ما تظل ظلمة ..
وأنة جبت العمر ورگة بغصن مكسور
ما أحس بالندى ولا أشوفة ولا أشمة..
شمدريني الكحل يفتح علية الباب
وأنة معاند چنت ما أفتحة للنسمة..
عرفت آني أحب من بدت روحي تخاف
من أكتب قصيدة وترجف الكلمة..
من صار النجم يحچي وي گلبي عيون
وبية السما الزرگة أندفت مغيمة..
سهلة الدمع من يطشر أعلى الگاع
بس مشگلتي گلبي الطاح شيلمة..
لا تحضني خاف يجفلك العطاب
بعدك ما تعرفة المحترگ دمة..
ظنيتك جرح تفهمني إذا طعنوك
طلع هو الجرح بس دمة يفتهمة..
أنة صافن مثل شجرة إعلى باب البيت
ولو هو اليحب صفناتة متهمة…
أخط أسمك على الحيطان من أشتاگ
ومرات من أحن باليل أشتمة..

شاهد أيضاً

اوقت الساعة – حمد البريدي, قصائد مكتوبة

قصيدة اوقت الساعة للشاعر حمد البريدي, قصائد مكتوبة اوقتّ الساعه على الذكرى واعيشها مع فارق التوقيت …