قصيدة جواهر – علي المنصوري

قصيدة جواهر للشاعر علي المنصوري مكتوبة

علي المنصوري

تعال البيه ما ينگال ياريتك تجي تحسه
انه اتحزم اطلع كل حچي مضموم
اصير گبالك وانسى
ولا كلمه اعرف احچي بعد الشلونك
اجيك واحلف بچم آخ
اله احچي واضل مشغول بعيونك
هيه السالفه كلش سهل فرگاك
بس علمني من دونك
احس روحي طفل بي شيب
يالمرجوحتي متونك
عييت واني مناطرك شجرة بر
اگبل تسير لو بنية حطاب
غيرك سگاني ودي ارجع اخضر
وبيده مسح كل شيبتي وردني شاب
لكن انه الرافض بغيرك مگدر
البالعشگ مرتاح اصلا ماحاب
داعيك حرا
على متونك وكر
طبع الصگر ما يرمي شوفه على غراب
اشغلت بالي لان وجهك عمبر
المو شلب ينطرد من المشخاب
لولا مخافي عليك ماصرت اصفر
الخوف من الشگ نجلدك يكتاب
نعمه الخضار الفيك بس لا تنغر
المنستر لا ينكر افضال الباب
ليليه اعاتب گلبي لمن نسهر
يكول انسى وانه ادري كذاب
يبتدي يومي لو شفت وجهك مر
العيد للأطفال يبدي بدولاب
بس اگبل كل الصعايب تصغر
كبر الذنوب تريد فتحة سحاب
يحليلك ويازينك ابيض واشگر
ماضم معاني الوجه ثخنك ينگاب
اني حسب ضحكاتك اصغر اكبر
داعيك كيفك شايب تسوي شاب
شيصير من يتحاضنن برد وحر
بعد الحرب يتحاضنن سيف وگراب
ياعبله مو كل بشر اسود عنتر
السنه فيها شهور مو كلهن آب
اني اغار عليك مني واكثر
امنيتي گرب امك تلبسين حجاب
خليتني في حاله ماتتصور
تطعني وامسح خنجرك من الدم
مريت حنه واكفين وننطر
وحواجبك عاگدها ما تتكلم
حتى مع اصحابي اضم واتستر
يگولون ما سلم واگول سلم
المفروض فيني ما اثق واتمرمر
اقسم اتعلم وابقى ما اتعلم