اشتقت لك يا بعد حيي وحياني – عبدالكريم الجباري
اشتقت لك يا بعد حيي وحياني
لا يا بعد تلبيات البيض لالبنٍ
اشتقت لك شوق ما عبره بلساني
شوقٍ يخلي ضلوع القلب يشتبنٍ
عليك ياللي تواصلني وتجفاني
ويمك هباهيب شوقي كل ما هبنٍ
يا مهرةٍ تسنها من خيل ابن ثاني
صفرا تسمن بطون الخيل لا قبنٍ
بنت الكحيلا وابوها ساس حمداني
تفهق الخيل بالميداني لا طبنٍ
قالت انا بطلبك تكفى على شاني
ودي ببيتين منك كانك تحبنٍ
قلت ابشري لو بغيتي كل ديواني
لا يابعد كل من هبن و من دبنٍ
انتي هنا مزبنك في وسط شرياني
والشمري تعرفين ان زبنك زبُنٍ
يامهجت الروح يا روحي وريحاني
ما اعرف ويش الليالي عننا خبنٍ
امشي ولا ادري غرامي وين وداني
ومن لامني في دموع الشوق لا صبنٍ
شوقي عفيف وعذاب الشوق خلاني
اقول للوصل دمت وللجفى تبنٍ
