اشعار مكتوبة للشاعر محمد ناصر الحربي

قصائد مكتوبة للشاعر السعودي محمد ناصر الحربي

محمد ناصر الحربي

بعض العرب لافشل عوّد على اهل النجاح
ماكف شرّه ولا سوّى نجاحاتها !
تلقاه مثل الذبابة وقعها بالجراح
يفتّش عيوب خلق الله وسيّاتها !
وان جيت بتفهمّه طنّب وزاد الصياح
كنّه دخل بالقلوب وشاف نياتها !
ياشين لاتحاسب الناجح بماضي وراح
الناس تكبر وتتغيّر قناعاتها !

^^^^^^^^^^^^^^^^^^

الناس هذي هي من خلقة الناس
تتبع غرايزها وتتبع طمعها !
والامعة من غير تفكير وإحساس
الناس وين تروح ويروح معها !
والخايف اللي دايم يباري الساس
لانافعٍ نفسه ولاحدٍٍن نفعها !
خلك كفو يقدح من الراس للراس
والحاجة اللي ماتجمّلك دعها ! .

^^^^^^^^^^^^^^^^^^

العيد عيد الله وعيد الحبايب .. قلوبهم عند المواجه تراقص !
واعزتي للي عشق شخص غايب
هذا هو اللي عنده العيد ناقص !

^^^^^^^^^^^^^^^^^^

الحب شكله كذب والكذب خيبة
والا بلاش السالفة كلبوها !

انا اشوف الام أصدق حبيبة
واصدق حبيبٍ للبنيّة أبوها !

^^^^^^^^^^^^^^^^^^

ياصاحبي جيت لك وانا بصدري كلام ..
اشكيلك الظلم واتحسّب على من ظلمَ !
مابين ضحكة حزين وبين خوف وملام
استغفر الله والله يعلم اللي علَم !

الله ياوجهك اللي مثل بدر التمام
ينوّم اللي صحى ويصحّي اللي حلَم !

بكيت في حضنك وصدري عليه السلام
ومع كل دمعة تطيح يطيح معها ألَم !

^^^^^^^^^^^^^^^^^^

وبلاش لاتسوي حركات فزاع
فزاع من صلب الشيوخ العظيمه !

الله عطاه المال والجاه والباع
وتكرم من يدينه يدينٍ كريمه !

والا انت لامن جيت في راس مطلاع
احذر تجي شهرتك من غير قيمه !

وان كنت فعلاً سبع فالعالم سباع
ياللي تحسب انّك لحالك صتيمه !

^^^^^^^^^^^^^^^^^^

انا وصديقي مثل عينين في راس
معنى الصداقه فيه معنى حقيقي !

اشاركه فرحه وضيقه على ساس
وايضاً يشاركني بفرحي وضيقي !

اللي لاصار الوضع في وقت حساس
تلقى طريقه مايجنّب طريقي !

واللي شملني هه مع جملة الناس
هذا صديق الناس ماهو صديقي !

^^^^^^^^^^^^^^^^^^

البنت تعشق بكل ماجات من قوّه
تقدر تقول انّها بالعشق مجنونه !

تخون يمكن عشان العشق والخوّه
لكن حبيبٍ تحبّه صعبة تخونه !

والرجل لامن عشق يعشق من مروّه
تلقاه بيّن عليه بنظرة عيونه !

وبعض الرياجيل عشقه ماشي بجوّه
وأدناة مَ يغيّره ويغيّر ظنونه !

والعشق في نظرة المحروم متشوّه
لامن عشق له حبيب وقفّت ضعونه !

^^^^^^^^^^^^^^^^^^

طاح الوعد من جمعة الصد والكبْر
عليه قامو بالسكاكين غدره !

حرام ماخلّو بجسمه ولا شبْر
الا اطعنوه وسيّل الدم حدره !

ووجه الوفاء ممّا حصل صايرٍ غبْر
قد طاح من عين الوعد نص قدره !

والله لولا قومةٍ قامها الصبْر
يمديه مات وشقّق الموت صدره !

^^^^^^^^^^^^^^^^^^