قصيدة الزمت قلبي على الصده وطوعته – خالد دخيل مكتوبة كاملة
الزمت قلبي على الصده وطوعته!
واجبرت نفسي تطيع وتقبل احكامي
والحظ الاعوج تحديته وزينته!
والحب عفته وعفت العشق وهيامي
والشوق لاجر قلبي له .. تجاهلته!
ماعاد فيني شعور يهيض الهامي
باب الغرام وعتاب الحب قفلته!
عايش حياتي لنفسي وعنه متعامي
ولا انت ياللي عصيت العقل ودللته!
ياما نهاني عليك وقلبي يحامي
جاي اتشفع في قلبي بعد ما اهملته!
ماعاد هو مثل الاول يقدر ارغامي
حبل الوصل بيننا في ايدي قطعته!
من بعد ماكنت اشوف انك من ارحامي
اعاف شي يجيني ماهو بوقته!
لو كان غاية مناي وصار قدامي
