الكبير كبير – انور المشيري قصائد مكتوبة
إن صغرت بعيني شيْردّك كبير
ما مليت عيوني لو وزنك ذهب
الكبير كبـير بـخلاق وضمـير
والصغير صغير لويحمل لَقب
فيك وبلـيّـاك أنـا حالي بـخيـر
يعني خَل ماك بسماك ولا تصب
وبخضوعي إصحى لاتحلم كثير
دام راسي حي ويْـشم المهَـب
تدري ليه اتشوفني بعينك صغير؟!؟
شوف ذاك النجم وتْعَرْف السبب
ما خلقني ربي انصالك كسيـر
النَخَل يرقى له من يبغي الرطب
الـتواضع يِجعَل المُـعـدَم أميـر
والخُـلُق يا صاحبي شي مُكتَسب
كم فقـير وْ زاهـدٍ فَـرشه حصير
ما قرا التاريخ / بس فيه إنكِتَب
والوجاهه لـوهي بالمال الـوفير
قلّي وش سوّى في ماله بولهَب
غَـيّـر الـتـاريـخ أمّـي ٍ فـقـيـر
ما قـَرا عمره ولا عمره كِـتـَب
يعني خَلّك صوب وإركد لا تطير
لْا تـّصاغرني ويصدمك العَجَب
الشراره صغيـره لكن البصيـر
يعرف إنْها تْحوّل الغابه لَهب
وإختصار اللي بقوله في الأخير
حكمة ٍقالوها من قبلي العَرَب
لا تـمر النـار وثـيـابـك حـرير
وإتقي شر الحليم إذا غضب
