الله يسهل طريقه – محمد جارالله السهلي قصائد مكتوبة كاملة
كانت الدنيا تساهيل ومسرّه
قبل اعرف اقصاه واعرف الحقيقه
ليت قلبي سطحي ادنى مايغرّه
العميق جروح خذلانه عميقه
الطواري ما وراها الاّ المضرّه
تبدي السجّهً وتقفاها بـ ضيقه
اشغلوني فالحكي خيره وشرّه
ولاّ شوفوا لي على السلوى طريقه
ياوجودي والعمر ماغير مره
اخذوا عشر سنين و اعطوني دقيقه
امنع الصدفه عن دروبٍ تمره
واسلم بقلبي وماضيه بحريقه
قد سمحت من الهوى حلوه ومره
لو هبوبه شرق وانسامه رقيقه
وااا ضما روحي تحت وبل التشره
ما احدٍ من دموع عينه بل ريقه
كنها هوية شهاب من المجره
دمعة العاشق على فرقا عشيقه
وكني انزع ضلع صدري من مقره
يوم اقول الله يسهل له طريقه
والله ان ماهو بصفطان ومبره
مير درب الهون نفسي ماتطيقه
الكرامه غالية والنفس حره
من ترخصها رخص عند الخليقه
