سلامي على اللي شوف وجهه يرد الروح – سعد علوش قصائد مكتوبة كاملة
سلامي على اللي شوف وجهه يرد الروح
ليا اقبل بها شين الأوادم على الموته
احبه ولا لي من ورى محبته مصلوح
واضيّع زهر عمري وادور على صوته
ولو ماتكلم والله انه هو المسموح
عن احلا كلام الناس يكفيني سكوته
ليا اقبل علي ماكنه الا الخطا المدموح
كذا مشيته مابين ضعفه وجبروته
يشل اشقرن تغلي به الشمس لين تفوح
على اكتافه الي من جبل ثلج منحوته
يدثره شالٍ كنه من الندى ممسوح
خيوطه وهي من عادها ريش مبخوته
تسيل اللذايذ منك يالكاعب المملوح
وتنبت على هاروت سحرك وماروته
اخذني معك لو بس قلي لوين اروح
وشفني بنظرة مالكن في ملكوته
عيون الرضا ماكنها الا سفينة نوح
من آمن بها ينجا ومن كابر تفوته
