على الله معلق طموحات وآمال – ماجد لفى قصائد مكتوبة كاملة
على الله معلق طموحات وآمال
وبإذن الله انها واصله بالسلامه
انا القنوع اللي مع الوقت لازال ؟
يدور لمنزل يناسب مقامه .
مريح راسي عن القيل والقال !
ومن مجلس يجمع وجيه الرخامه
اقزر الايام نازل ورحال ،
وابني طموحي واتجنب هدامه !!
ما عاد اشوف الارض لارضاي تختال
بروح اتكي فوق متن الغمامه
شربت لي من مر الايام فنجال ..
لين امتلى راسي شموخ وشهامه
اواجه ، ظروف الزمن وادحم جبال
وان كشرت قابلتها بابتسامه !
ولاني مصدق خرافات الامثال
لا علقت قلب الغشيم الغشامه
فـ ياللي تقول ان كان لك حيله احتال
اقول ما يحتال غير الهلامه !!
اما كسبت الشي بمصادم رجال ،
ماني ملحق من وراه الندامه .
الطيب حق وكلمة الحق تنقال
لا خير في رجال ترجف عظامه !
والخوه ؟ بعيني لها قدر واجلال
ولا اخاوي الا من يبرهن كلامه
بالوقفه اللي تفحم وجيه الانذال !
وبالفزعه اللي فوق راس العدامه
الناس ! تفرق بالطبايع والاشكال
وتبين فـ عيون الحرار العلامه
روسن خلقها الله تنومس بالافعال
وروس خلقها الله لـ نسف العمامه
يا صاحبي ؟! عيش الحياه بسعة بال
ولا تطمع الا بالسمو والزعامه ..
واثبت لو ان الوقت عن كفتك مال
واليا جفا الصاحب وغير نظامه
وعادي لو انك تخسر اصحاب واموال !
اهم حاجه لا تخسر الكرامه .
