قصيدة المشاريع – محمد ناصر الحربي

قصيدة المشاريع – محمد ناصر الحربي قصائد مكتوبة كاملة

الله من ليلن قضيته مشاريع
ابني عمد مشروع واهد مشروع

والمشكله لا صبحت مامن منافيع
مثل الذي يرجي من العفن منفوع

واليا خشعت بساع ضمن الخواشيع
تاتيني الاحلام واقوم وافوع

من همّي اللي مزع الجوف تمزيع
واحس في قلبي تقل ضرب فاروع

وهمي ماهو طرد البنات المفاريع
ولاني من اللي يشكي الفقر والجوع

انا بلايه طـوّع النفـس تطويع
مرات مامورن ومرات ممنوع

واضيع انا وادل من بعد ما اضيع
ويفوتني موضوع واعرف موضوع

جربت في وقتي دروبن مناويع
وشربت انا بالكاس من كل قرطوع

وقتن مداخيله بعاد المطاليع
كنّي بوسط البر مرمي ومقطوع

تعبت من طرد الليال المكاويع
مره على ساقن ومره علـى كوع

اليا قبلت جتني سوات الينابيع
وان دبّرت باموت ماشفت منبوع

ماتصفي الايام كـل الاسابيـع
اليا ضحكت اسبوع تبكيلك اسبوع

كم فرقت من ناس كانو مجاميع
وكم واحدن من موت غاليه مفجوع

احدن ينام وكـل نومـه تقاطيع
واحدن ينام ولايوعيه فاجوع

لان العفي ماهو سوات المواجيع
مايونس الاوجاع ياكود موجوع

ولا كل ماترمع تصيب الرواميع
اليا صدق راموع يخطيك راموع

ولا كل ماتبغى تلاقيه للبيع
يمكن تجي تشريه تلقاه مبيوع

ولا تحتقر ذاللحين حتى الجرابيع
يمكن يجي موتك على يد جربوع