قصيدة لاصدقائي للعدو للشاعر حمد البريدي قصائد مكتوبة كاملة
لاصدقائي للعدو .. تقديري وكل احترامي!
يصلح الله كل شان ويجلي الله كل غمه
الحياه الفانيه ماهي بمن ضمن اهتمامي!
اهتمامي فالقلوب وفالعقول .. بكل يمه
والتامل في بعض الاحداث يدعو لانقسامي!
بين تفسير الجروح وبين هقوات مطمه
امة محمد تمر بمنعطف والضرب حامي!
يا الله انك تحفظ اللي باقي من عز الامه
يعتلي صوت الكذوب وتامن الناس الحرامي!
وينخفض صوت السلام ويختفي علم الائمه
والسموحه .. يا معاليني على كثر التعامي!
الحقيقه .. ودي اذكر بعض الاشياء المهمه
والله اني عارف قدري وعارف وش مقامي!
ما تلفت للرخوم ولاعلي من كل رمه
وانت يا اللي ما سقيت الابل وهي تارد ضوامي!
ربك اسقاها ووردها على عشرين جمه
لا تغار من الزحول اهل الفعل واهل التسامي!
خل في قلبك شعور خل في يمناك همه
الكفو لا طرو اسمه واعتلى فوق الاسامي!
دام ما تقدر على مدحه .. فحاول ما تذمه
