قصيدة لا تنتظر مني سلام للشاعر محمد السبيعي قصائد مكتوبة كاملة
لا تنتظر مني سلام ولا كلام ولا وداع!
لي قيمتي وليا دعتني شيمتي طاوعتها
كلفت نفسي فوق طاقتها وفوق المستطاع!
ولا كنت ادقق في حساباتي ولا راجعتها
ولا كنت هاقي فيك تلبس طول هالفتره قناع!
لين انكشف وجه الحقيقه والعيون اقنعتها
صدمتني صدمة عمر الى حد النخاع!
لكن تبي تبرى جروح الروح مهما اوجعتها
اهم شي ما ينحني راس يحب الارتفاع!
ولا ترتخي نفس على درب العلا طبعتها
انا اكتشفت انك تساومني على لوي الذراع!
بأفعالك اللي تفضح النيات لو روقتها
لذا اعتبرتك في حياتي من سنوات الضياع!
وانت اعتبرني في حياتك فرصه وضيعتها
