قصيدة مع او ضد حمد البريدي

قصيدة مع او ضد للشاعر حمد البريدي قصائد مكتوبة كاملة

تشد انتباه الناس قصة مع او ضد
والافكار منقسمه والاهواء ترهنها

وانا مع شعور اللي شعوره بليا حد
ولا اقيم العالم على حسب اماكنها

مع الصمت .. دام القول يجرح ولا له ند
ومع الكلمه اللي حان للبوح حاينها

مع الود .. ماني ضد من ينشرون الود
ترى النفس تالف نفس من كل صاينها

مع الوصل .. ماني ضد من يتقنون الصد
لو الصده احيانا دوى اللي يداينها

عدم ردك لبعض الاوادم هو اجمل رد
ومربط فرس للراحه اللي تعينها

اذا زانت ايامك معك .. لا تعلم حد
واذا شانت ايامك عسى الله يزينها

مادام الحياه الفانيه .. فانيه لابد
فلا تعطي اوقاتك سوى من يثمنها