مايهز الجبل ريح – حامد زيد

مايهز الجبل ريح – حامد زيد قصائد مكتوبة

أمسيت في ليلة نميمة وتجريح
والحقت بصغار العقول الهزايم

واطفيت عن كثر الكلام المصابيح
واصبحت ولساني عن الذنب (صايم)

تركتهم بين السهر والتباريح
اشبع رقاد ومابهم جفن نايم

يلوحون وماني بيم تلويح
مقفي بسمعي هــروج النمايم

ولوني من اللي يربكه كل تلميح
ماكان صرت في مقدم السرب دايم

عاقل ولو يكثر كلام المشافيح
محشوم لو زادوا علي التهايم

لأني جبل ولا يهز الجبل ريح
وعزيمتي تنطح كبار العزايم

اطيح القايم واذا قمت ما اطيح
وان جا فـ يوم وطحت ، باطيح قايم

اليا حضرت ادحم متون الزحازيح
وان طالت الغيبات جبت الغنايم

ولو كنت صيده في شباك الطواريح
ماصرت عشق محشمات اللثايم

اللي يبي يزعل بلا ذنب بقريح
ماني ورى طرد المقفين هايم

الهرج واضح مايبي زود توضيح
حتى ولو بيلومني فيه لايم

اسكت حشيمه للوجيه المفاليح
والا ترى ماني عن الهرج (صايم)

وياللي يدور من وراي اي تصريح
لا يستحل ضهورنا بالشتايم

مافيه داعي ترفع الصوت وتصيح
تراي ساكن في شمال القسايم