قصيدة منت بمثل غيرك للشاعر مبارك الحجيلان, قصائد مكتوبة
ماأنت بمثل غيرك سهالات لو راح
بدى بك القلب بغلا / وانتهى بك
•
•
والفرقا مثل الموت / نزاع الارواح
لكنها أهون عليّ ،،،، من عتابك
•
•
نعم اعتابك غير / والشك ذباح
وأنا بشر ،،،، فيني ترى مثل مابك
•
•
وتوي امتعافي من هواجيس وجراح
ولااقدر أسمع مِنْك / قسوة جوابك
•
•
بقولها فالوجه ،،،، مليت أبرتاح
ومن أولٍ كنت أشكر الحظ جابك
•
•
كان التحدي نقلب احزانك افراح
وأغيّر افكارك / وأعالج صوابك
•
•
لأني أشوفك طير ،،، لكن بلا جناح
والحزن يقتل فيك / زهرة شبابك
•
•
صفيت لك بمسح لك الدمع لاطاح
وكنت القريب أقرب إلك من ثيابك
•
•
لكن مشاريهك غدت ،،، سمٍ ذحاح
وتغيب ثم تزعل ،،،، وأنا عند بابك
•
•
ومدري هو غيابك يخليك مرتاح
والا غلاك تجربه في غيابك !!!!
•
•
كم جيت باشواقي لو الشوق فضاح
على وعدي / بخلصك من عذابك
•
•
وفي كل مره /ترمي سهام ورماح
وتحاسب اللي كان / يحسب حسابك
•
•
كان الغلا باقي ،،،،، ولا كان ينزاح
ولا ضيعه : غير الظنون وعتابك
