نعمة الاهل – راكان النعيم قصائد مكتوبة كاملة
قعدت افكر بالعمر ويش تاليه
وعرفت شي مايبي له تغاضي
موضوع يحتاج لعنايه وتنبيه
شي واقعي ماهو بشي افتراضي
أهلك هم لذات عمرك ومافيه
جمعتهم اصدق شي بيكون ماضي
أمك هناك بحضنها اخوك تفليه
وابوك داخل وبيدينه مقاضي
وتسمع حدا أخوانك وصوته معليه
يقول منهو اللي ماخذ ً اغراضي
واختك بوسط البيت دايم تزهيه
تضايق اليا شافتك مانت راضي
ويبكي حدا الورعان ويفلت يديه
ويزبن على امك صارت الام قاضي
وامك تجي منهواللي مبكيه
والله غير اقلب عليه الاراضي
وابوك بالمشراقة يمد رجليه
وتلقى بطوارف صابرينه بياضي
عموماً الحق عالعمر لا تخليه
عز الله انه اوشك على الانقراضي
الابو يكبر (والكبر ويش تاليه)
والام ايضاً ليش عاد التغاضي
والاخت تقفي مع رجلها وتغليه
واخوك ماهو بكل الايام فاضي
وترجع لمسكنكمتبي تشوف وش فيه
وتلقى السوافي مغطيات الاراضي
وتقعد تأمل واتضايق وترثيه
وهذا امر ربك ماعليه اعتراضي
وتقعد وتقول ااالله يازين ماضيه
ياليت ذاك الوقت ماصار ماضي.
