يابو غلا والسهر مزروع بأحداقي
وأجني من أغصانه المتدلية قوتي
كله على شان وجهٍ يكره فراقي
فيه الحسن ( يوسفي ) , والسحر ( هاروتي ) !
وجهٍ بعث لي السلام , وحسّن أخلاقي
وعلّقت جنبيّتي , وأهديت ( نبّوتي )
من نبرة الصوت ؟ تقدر تكشف أعماقي
حتى تعابير وجهي تفضح إسكوتي
وإذا تكلّمت لك عنها من أشواقي ؟
جمالها تقدر تشوفه على صوتي
أملك بساتينها اللي مابها ساقي
ياربي تبارك برمّاني و توتي
الطلة الفاتنة و المنطق الراقي
من لهجة ( أبها ) خذت , والوجه ( بيروتي )
يابختي بغيمةٍ تشتل برّاقي
إتخيلك عيون تحسدني على بخوتي
الشعر باقي مادام إن الحُسن باقي
أما أنتي من أوسع أبواب الشعر فوتي
يافتنة الهاجس اللي يفرد أوراقي
وياخذ من خصالك ويبني بها بيوتي
( أنا أحبك ) وذا زرعك على أحداقي
و ( أموت بك ) ياحياةٍ جمّلت موتي
