اجمل متاهات العمر – فيصل العدواني قصائد مكتوبة
قل للمليحه لا تجي
الناس وعيون الغفير
تراقب الوصع بخفا
لا جات ولا جيتها
يا الله تلهمني الصبر
وتعدي الفتره بخير
وشلون ما المحها
ولا اقرب طوارف بيتها!
وانا الاسير بحبها
لو كنت بارض الله اسير
مبطي .. وانا ماني معي
بالضبط من حبيتها
اهديتها العمر برضا
من دون لا شاور شوير
واهدتني البسمه كذا
كل ما ضحكت واوحيتها
الجاد .. الى بعدها
اعلنت تحديد المصير
تسري لها اشواقي طرب
واطرب اذا سريتها
الناعمه ساس الغنج
يا اللي نهت سوق الحرير
الطاغيه بكل الفتن
لا تلومني لا اغليتها
يا اللي حكاويها شعر
وش هو الفرزدق مع جرير
لا عادت الهرجه علي
يا عنك ما مليتها
ويا اللي شذاها لا اعرضت
مسك وسافر به عبير
لا مر بالنسمه علي
افرح اذا ضميتها
اخذ شهيق بلا زفير
بلا زفير بلا زفير
ما ودي اترك عطرها
واهيم لا كنيتها
اجمل متاهات العمر
من اوله لين الاخير
دايم تشتتني وانا
مدمن على تشتيتها
ما هانت بلحظه علي
واسابق الموعد واطير
اخاف يمنعني الزحام
ويفوتني توقيتها
واليوم من بعد الوصل
صار الذي خايف يصير
مكدر اجيها ولا تجي
مجبور لو خليتها
هايم وهي مثلي
ولا بانت تباشير البشير
والليل عيا ينتهي
يا ليتني , ويا ليتها!
يا كن بضلوعي جمر
واطراف جسمي زمهرير
مافيه جره للحزن
بحشاي ما جريتها
الله يعاقب هالزمن
والوقت وعيون الغفير
وناس علينا استلعنت
الله يخرب بيتها
