قصيدة رسالة انور المشيري قصائد مكتوبة كاملة
يا بوي وأمي .. والرسالة رسالة
فيها كلامٍ ينبض بْـ قلبي سنيـن
أكبر من إحساس القصيد وخياله
كبير .. لكنـّه عِـجَـز يوفي الديـْن
غـلاكم اللي جعـْل عمري فِدى لـه
كبر السما والأرض وما بينها البين
وشلون أبوصف حب هذا جمالـه؟!
وشلون أفَـرّق بين هالعين وهالعين
أمي يا أعذب إسمٍ إلـساني قالـه
عشان أوَفّي قـَدرِك أحتاج عمرين
من قبل اجي شلتيني هَمّ وعبالـه
كبرت وانتي شايـله هَمّي لـلحيـن
يللي بـْ دُعاك إيزين عمري و فالـه
وإذا إبتسمتي الدنيا في عيوني إتزين
حـنانـك إنتي ويـن أبلـقى بدالـه؟!
عطفك وطيبك يَا بْعَدي مثْلهم وين؟!
وإنـتـي هِـبَـة رَبٍ تـبـارك جـلالـه
يا جِعْلي أفدى تْراب رجلك وترضين
ويا بوي يا بيتٍ نعيش فـْ ظلالـه
يا قلبٍ أكبر هَمّه إنكون راضين
إن قالو به مثلك اقول إستحالـه
ما يشبهك غيرك وما منّك إثـنين
نعـتَـزّ بك .. لا قِـلـنا حِـنّـا عـيالـه
يسلَم لنا راسك و تِسلَم هالإيـدين
رحمة من الله إنتْ/ ومثلك خصاله
لو وُزّعَـت ع الأرض مايبقى مسكين
يا بوي وأمي إنـتـو عالَـم لحالـه
وغلاكم بـْهالقلب مقسوم نصّيـن
هذا شعوري وإختصار الرسالـة
ألله لآ يحرمني شوفتكم ..آميـن
