من وين اببدا فيك وين انتهي بك؟ – علي الخوار قصائد مكتوبة كاملة
من وين اببدا فيك وين انتهي بك
وانا بكل مافيك مفتون .. مفتون
ان قلت اببدا في كرزك وزبيبك
اخاف يزعك كحلك وتزعل جفون
ترمس وانا اسرح في غنا عندليبك
تضحك واحس بضحكتك يضحك الكون
تيلس ويتناثر شذى عطر طيبك
توقف ويوقف قلب وتسمي عيون
تقبل بطيبك واللقا يستطيبك
ويميل غضن الموز ويغايض غصون
في خطوتك هيبة ملك واستهيبك
كنك لحالك والملا معك يمشون
تقبل علي ومن غلا احتفيبك
وتفز حملة مرحبا الساع مليون
وان رحت عني حرت وين اشتكيبك
وبخاطر مكسور لك قلت بالهون
ما بيني وبيني بديت استغيبك
اغتاب بعدك وانت والله ماتهون
بيني وبينك قلت ربي حسيبك
وشلون تترك ظاميك وانته مزون
صاحبك ميت شوق صار يهذي بك
ومرا يهذي بعقل وامرار من دون
ويقول انا صاحبك ولا حبيبك
مجنون مثلك ولا انا بس مجنون
ليت الطريق اللي سرى بك يجيبك
ليته يحس بلهفة الشوق وشلون
مافيك عيب الا البعد صار عيبك
ولا انت في كل شي مزيون مزيون
شفتك وعيا القلب لحظة يسيبك
اما معاك يكون ولا فلا يكون
من يومها حطيت قلبي فجيبك
يعني غديت لصاحب القلب مديون
