قصيدة ادور لي فرس للشاعر حمد البريدي قصائد مكتوبة
ادورلي فرس ماهي بمعسوفه
ابعسفها على ايديني .. وادربها
اسايسها على الميدان وظروفه
على سلهامها ولا ذوايبها
طبيعة كبرياها غير مألوفه
غريبة لون كن الصبح يسكبها
تقول انها من الانوار .. مغروفه
رسنها في يدي والقلب كاسبها
مناسبها من آل وآل معروفه
جموح في الجمال وفي مراتبها
الى منها مشت بتقول منجوفه
على ظهر تثنى من ترايبها
والى منها اسلبت بالرمش وسيوفه
تحاربني من النظره واحربها
والى منها تمادت .. كبدي وجوفه
حلال انها تعاتبني واعاتبها
ياذاك الوجه يا ويلي على اشوفه
ما غير تمرني الايام واحسبها.
